UMUGABA MUKURU W’INGABO Z’U RWANDA YASOJE AMAHUGURWA YA OFISIYE N'ABANDI BASIRIKARE BA MILITARY POLICE
Umugaba Mukuru w’Ingabo z’u Rwanda (RDF), Gen MK MUBARAKH, kuri uyu wa Kabiri tariki ya 11 Kanama 2026, yayoboye umuhango wo gusoza amahugurwa ku basirikare 146, barimo Ofisiye n’abandi basirikare, basoje amahugurwa y'Urwego rushinzwe imyitwarire no kurinda abayobozi (Military Police). Ni imyitozo ya gisirikare yamaze ibyumweru 7, yabereye mu Ishuri Rikuru rya Gisirikare i Gako, ku bufatanye bw'Ingabo z'u Rwanda n’Ingabo za Qatar.
Uyu muhango witabiriwe na Ambasaderi wa Qatar mu Rwanda, Nyakubahwa Mansoor Ali Al-Hajri, Ofisiye bakuru bo mu ngabo za Qatar hamwe n’Abajenerali na ofisiye bakuru bo mu Ngabo z’u Rwanda.
Amahugurwa yibanze ku mirimo y’ingenzi ya Military Police, harimo kurinda abayobozi bakuru, kurwanya iterabwoba, ubumenyi bwo kurwanira mu bice byubatse, ndetse no guhosha imyigaragambyo n' imvururu.
Mu butumwa yatanze mu izina ry’Umugaba w’Ikirenga w’Ingabo z’u Rwanda, Umugaba Mukuru w’Ingabo z’u Rwanda yashimiye abarangije amahugurwa ku bwitange n' ikinyabupfura bagaragaje mu gushaka ubumenyi n’ubushobozi bukenewe kugira ngo bashobore kuzuza neza inshingano zabo.
Yagaragaje ko aya mahugurwa yagize uruhare mu kongera ubunyamwuga n’ubushobozi ku basirikare ba Military Police n'ingabo z'u Rwanda muri rusange. Yasabye abarangije amahugurwa gukoresha ubumenyi n’ubushobozi bungutse, ndetse bakabusangiza bagenzi babo.
Umugaba Mukuru w’Ingabo z’u Rwanda kandi yashimiye abarimu baturutse mu Ngabo za Qatar kubera ubunyamwuga n’ubushobozi bagaragaje mu gutanga aya mahugurwa. Yashimangiye akamaro ko gukomeza ubufatanye hagati y’ingabo z’ibihugu byombi, avuga ko iki gikorwa ari indi ntambwe igaragaza ko ubufatanye hagati y’Ingabo za Qatar n’Ingabo z’u Rwanda bukomeje gutera imbere.
Yongeye gushimangira ko u Rwanda rwiyemeje gukomeza guteza imbere ubu bufatanye binyuze mu mahugurwa ya gisirikare, kungurana ubumenyi n’ubunararibonye mu by’umwuga wa gisirikare, n'ibindi bifitiye inyungu impande zombi.
Uhagarariye Ingabo za Qatar yashimiye ubuyobozi bw’Ingabo z’u Rwanda ku nkunga n’ubufasha bwatanzwe mu gihe cyose cy’amahugurwa. Yashimye kandi ubufatanye bukomeye n’imikoranire myiza hagati y’Ingabo z’u Rwanda n’Ingabo za Qatar, avuga ko byagize uruhare rukomeye mu gutuma aya mahugurwa agenda neza.