UMUGABA MUKURU MUSHYA W’INGABO ZA UNMISS YASUYE INGABO Z’U RWANDA MURI SUDANI Y’EPFO
Umugaba Mukuru mushya w’Ingabo z’Umuryango w’Abibumbye muri Sudani y’Epfo (UNMISS), Maj. Gen. Junhui Wu, kuri uyu munsi yasuye ingabo z’u Rwanda (Rwanbatt-1) zikorera mu Kigo cya UN Tomping kiri i Juba muri Sudani y’Epfo.
Maj. Gen. Wu yakiriwe n’Umuyobozi wa Rwanbatt-1, Lt. Col. Paul Ndushabandi, ari kumwe n’aba Ofisiye bamufasha mu kazi ko kuyobora abasirikare. Muri uru ruzinduko, yahawe ibisobanuro ku bikorwa by’ingenzi byakozwe n’ingabo z'u Rwanda mu rwego rwo kurinda abasivili n' ibikorwa by’ubutabazi ku baturage.
Mu ijambo rye, Maj. Gen. Wu yashimiye abasirikare ba Rwanbatt-1 ku bwitange, ubunyamwuga n’umusanzu ukomeye bakomeje gutanga mu gushyira mu bikorwa inshingano za UNMISS, binyuze mu bikorwa bigamije guteza imbere amahoro, umutekano n’ituze muri Sudani y’Epfo.
Mu uru ruzinduko, Umugaba w’Ingabo za UNMISS yatemberejwe ikigo cya Rwanbatt-1 ndetse mu gusoza uruzinduko anitabira umuhango wo gutera igiti.
